रसुवामा ४३ हजार अमेरिकी डलरसहित एक व्यक्ति पक्राउ परेका छन् ।
बिज्ञापन
जिल्ला प्रहरी कार्यालय रसुवाका अनुसार उत्तरगया गाउँपालिका–५ बेत्रावती बजारस्थित पासाङल्हामु सडकखण्डमा नियमित सवारी चेकजाँचका क्रममा ठूलो परिमाणमा विदेशी मुद्रा बरामद गरिएको हो ।
बिज्ञापन
प्रहरीले काठमाडौँबाट टिमुरेतर्फ जाँदै गरेको बा.प्र.०१००६ ख ९५१५ नम्बरको यात्रुबाहक बसलाई रोकी जाँच गर्ने क्रममा उक्त रकम फेला पारेको जनाएको छ ।
मानसरोवर यात्राका लागि गइरहेको ३० जना भारतीय नागरिकको समूहका गाइड धादिङ गंगाजमुना गाउँपालिका–५ निवासी ३७ वर्षीय सुशिल गुरुङको साथबाट ४३ हजार अमेरिकी डलर बरामद भएको प्रहरीले जनाएको छ । बरामद रकममध्ये १०० डलर दरका ३६३ वटा, ५० डलर दरका ११२ वटा, २० डलर दरका २९ वटा, १० डलर दरका ५० वटा, ५ डलर दरका ३ वटा र १ डलर दरका ५ वटा नोट रहेका छन् ।
बिज्ञापन
प्रहरीले गुरुङलाई नियन्त्रणमा लिई आवश्यक अनुसन्धान प्रक्रिया अघि बढाइएको जनाएको छ ।
प्रहरी निरीक्षक राजु शाहले घटनाबारे जानकारी दिएका हुन् ।
